Oila rukniga oid latifalar | 10 dona — 2

Bog‘chadan qaytgan qizaloq kollejda o‘qiydigan opasiga shoshib:
— Opa-opa, sizga she’r aytib beraymi? - deb so‘rasa, opasi jilmayib:
— Mayli, aytib beraqol! - debdi. Qizaloq yana:
— Faqat siz qarsak chalib turing, xo‘pmi? - debdi. Opasi ham:
— Xo‘p, aytaqol! - deb qarsak chalishni boshlasa, qizaloq:
— Hamma qizlar o‘qishda,
Kitob o‘qib yuribdi!
Bitta ahmoq bu yerda,
Qarsak chalib turibdi! - dermish.

Bir yigit chet elda 5 yil yurib, uyga qaytibdi. Qaytibdi-yu, lekin nuqul ruscha gapirarmish. Qishlokdan xolasi ko‘rgani kelibdi. Salom-alikdan so‘ng xolasi hasrat boshlabdi:
— Bolam, o‘tgan yili pochchang ham olamdan o‘tdilar, - desa. Yigit:
— Chepuxa, - debdi. Xolasi u ruschasiga "Hudo rahmat qilsin" degani bo‘lsa kerak-da deb:
— Nima ham qilardik bolam, bizam "Chepuxa" deb o‘tiribmiz, - dermish.

Ikki aka-uka uzoq masofani qay biri yaxshi ko‘ra olishini sinash uchun bellashishibdi.
— Aka, hov anavi o‘rmonning orqasidagi cho‘lda bir chumoli ketayapti, - desa, akasi:
— Ha, ukajon. O‘g‘il bola chumoli degin, - dermish.

Aka-singil karamli salat yeb o‘tirishgan ekan akasi:
— Singlim, echkiga o‘xshab o‘tirishimizzi qara! - desa, singlisi:
— Siz balki echkiga o‘xshab ketyapsiz, men quyonchaman! - dermish.

Bir kuni qizaloq ukasidan so‘rabdi:
— Asalni rus tilida nima deymiz?
Ukasi:
— Myod, - debdi.
Qizcha undan:
— Novvotni nima deymiz unda? – deb so‘rabdi.
— Qattiq myod, -deb javob bergan ekan.

Oila dasturxonidagi shirinliklar 2 turga bo‘linadi:
1. Shirinlariga
2. Bunisini adamiz yesinlar!

Bir ayol radioga telefon qilib, efirga chiqibdi. Salom yo‘llamoqchi ekanini aytib, debdi:
— Salom zapravkadagilar. Orangizda 3 kun avval metan quygani ketgan o‘g‘lim ham bor.
O‘g‘lim Anvarjon, telefoningni quvvati tugab qolgan bo‘lsa kerak, telefon qilsam "o‘chirilgan" deyapti.
O‘g‘lim, sen meni tinglayotgan bo‘lsang, yaxshilab eshit! Sen ketgan kuning xotining o‘g‘il farzandlik bo‘ldi. Bugun uyga javob berishdi. Bolang va xotining sog‘-salomat.
O‘g‘lingni ismini yaxshi niyat bilan Metanbek deb qo‘ydik. Umri zapravkadagi navbatlardagidek uzoq bo‘lsin.
Keyingi hafta beshik to‘y. Imkon qilib kela olsang kelgin bolam. Bo‘lmasa xafa bo‘lmaymiz. Tushunamiz holatni, deb onang.

Er shimini hafsala bilan dazmollayotgan xotinini ko‘rib so‘rabdi:
— Tinchlikmi onasi?! Bugun chiroyli kiyinib ko‘chaga chiqsam, menga qizlar qarar ekan-da...! – desa xotini:
— Dazmollangan, yaxshi kiyingan erkak oilali bo‘lishini hamma qizlar bilishadi, - debdi.

Er-xotin dam olgani dalahovliga ketayotishsa, xotini uydagi hamma pullarni sumkaga solayotganmish. Buni ko‘rgan eri:
— Bor-yo‘g‘i 2 kunga ketyapmiz. Nima qilasan shuncha pulni? – deb so‘rabdi hayron bo‘lib.
Xotini debdi:
— To‘g‘ri, dalahovliga biz ketyapmiz. Lekin o‘g‘limiz 2 kun uyda qoladi-ku...!

— Ha o‘rtoq, kayfiyating yo‘q?
— Ey, xotinim yana janjal qilyapti.
— Nega?
— To‘rt yuz ming oylik yosh oilaga yetmaydi deydi.
— Tejab ishlatsa yetadi.
— Men ham shuni aytaman-da. U bo‘lsa “Yetmaydi, siz ham ishlang” deyaveradi.

Oila haqida latifalar

Latifa.uz loyihasi haqida

Boshqa loyihalar