Doʻkon-bozor rukniga oid latifalar | 10 dona — 4

Bir kuni podshoh xalqi qanday kun kechirayotganiga kiziqib, eski kiyimlarni kiyib olibdi-da, bozorga boribdi. Go‘sht rastasini oldiga borib:
— Bir kilo go‘sht necha pul?
— Besh tillo!
— Nega buncha qimmat?
— Chunki podshohimiz nodon!
Podshoh saroyga qaytibdi. Ertasiga bashang kiyinib, endi soqchilari bilan yana o‘sha go‘sht sotuvchisini oldiga boribdi:
— Assalomu alaykum, podshohim, - debdi sotuvchi.
— Go‘shtni qanchadan sotyapsan? - so‘rabdi podshoh
— Besh tillodan!
— Nega buncha qimmat?!
— Kecha siz nodonga aytdim-ku...

Xaridor qassobdan xarid qilmoqchi bo‘lib:
— Dumbangiz necha pul?
— Qo‘ynikini aytyapsizmi?

— Menga juda kuchli budilnik kerak.
— O, ayni vaqtida keldingiz. Bizda zo‘ri bor. Avval o‘t o‘chiruvchilarning sirenasi chalinadi, uning ortidan artilleriya ovozlari eshitiladi. Bu ham foyda bermasa, ustingizga bir chelak sovuq suv sepadi. Shundan keyin ham o‘rningizdan turmay yotaversangiz o‘zi ishxonangizga qo‘ng‘iroq qilib, sizning kasal bo‘lganingizni bildirib qo‘yadi.
— Kuchsizlik qilmasmikan?..
— Yana bittasi bor. Yuqoridagilarni bajarganidan keyin ham uyg‘onmasangiz, go‘rkov bilan domlani ham qidirib topib keladi.

Do‘konga kirgan mijoz sotuvchiga debdi:
— Kecha sizlardan ayollar paltosini sotib olgan edim. Xotinimga yoqmadi. Almashtirib bersangiz...
Sotuvchi hayron qolib:
— Bo‘lishi mumkin emas! Axir bu ajoyib palto-ku! Balki paltoni emas, xotinni almashtirarsiz?!

Bryus Li O‘zbekistonga kelib, Yunusoboddagi Stroy Mir ni aylanib yursa, qurilish asboblari do‘konida lomni ko‘rib qolibdi. Bryus Li o‘zini ko‘rsatib qo‘ymoqchi bo‘lib, sotuvchi cholga qarab turib, lomni qo‘li bilan qayirib tashlabdi-da, joyiga qo‘yibdi. Jahli chiqqan chol:
— Olmasang nima qilasan tegib, - debdi-da, lomni yana tekislab qo‘ygan ekan.

Bir xaridor nuqul 200 gramm goʻsht sotib olaverar ekan. Kunlar, oylar oʻtib, bir kuni oʻsha doʻkondan 2 kg. goʻsht sotib olibdi. Shunda sotuvchi “Nima boʻldi? Toʻy qilyapsizlarmi?” degan ekan.

Bir odam sigirini sotmoqchi bo‘lib bozorga olib kelibdi. Xaridor so‘rabdi:
— Sigiringiz sersutmi?
— Ha, suti yaxshi. Ammo bitta kamchiligi bor.
— Qanaqa kamchilik ekan?
— Sog‘ilayotganda qattiq tepadi.
— Hechqisi yo‘q, sigirni xotinim sog‘adi.

Bir talaba bozorda hushidan ketib qolibdi. Shunda odamlar:
— Suv olib keling, - deb baqirishsa, talaba hushiga kelib:
— Non esdan chiqmasin dermish.

Bir odam yo‘lda ketayotib, juda-yam isib ketibdi.
Do‘konlardan biriga kirsa, muzdekkina ekan. Biroz dam olib turmoqchi bo‘lsa, sotuvchi kelib so‘rabdi:
— Keling, nima olasiz?
Haligi odam:
— Dam olaman, bormi? – dermish.

Yosh bola do‘konga kirib:
— Asal bering, - deb sotuvchiga idishini uzatibdi.
Sotuvchi idishni asalga to‘ldirgach, bolakay unga:
— Pulini adam kechqurun berib ketadilar, - debdi. Jahli chiqqan sotuvchi, — Yo‘q, - debdi-yu, asalni qayta to‘kib olibdi.
Do‘kondan chiqqan bolakay qo‘lidagi idish ichiga qarab:
— Adam rost gapirgan ekanlar. Bu yerda ikkita nonga surtsa yetadigan asal chiqadi, - dermish xursand bo‘lib.

Doʻkon-bozor haqida latifalar

Latifa.uz loyihasi haqida

Boshqa loyihalar