Talabalar rukniga oid latifalar | 10 dona — 4

Bir talaba oshxonaga kirib qahva bilan bulochka olibdi-da, qo‘lini yuvish uchun ketibdi. Qaytib kelsa, qahvasi yo‘q emish.
— Kim meni qahvamni ichdi?, - debdi.
Hamma jim-jit.
— Kim meni qahvamni ichdi?, - deb yana bir martta so‘rabdi.
Yana javob bo‘lmabdi.
Uchinchi martta ham jahl bilan, — Kim meni qahvamni ichdi?, - so‘rabdi.
Bir barzangi yigit o‘rnidan turib:
— Men ichdim, - desa,
— Bulochkani nega yemadingiz?, - dermish talaba.

Professor tibbiyot talabalariga murdani ko‘rsatib so‘ramoqda:
— Ho‘sh Naimullo, bu murda nima sababdan vafot etgan?
— Domla, infarktdan o‘lgan.
— Adashding! Ravshanbek sen ayt-chi?
— Domla, u aroqni ko‘p ichganidan jigari shishib o‘lgan
— Qoyil Ravshanbek. Qayerdan bilding buni?
— Nahotki qo‘shnimiz Xayrullo amakini tanimasam...!?

— Agar dekan aytgan gapini qaytib olmasa, — bir talaba ikkinchisiga arz qilyapti, — men universitetdan ketaman.
— Qiziq, u senga nima dedi?
— “Yo‘qol universitetdan!”

Bir talaba ertalab mashinasida shoshib oʻqishga ketayotib, qizil chiroqda oʻtib ketibdi. Yoʻl chetida berkinolmasdan turgan GAI darrov toʻxtatibdi.
Hujjatlarni tekshira turib debdi:
— Bekorchi ekanmiz-da?!
— Ha bekorchimiz! - debdi talaba.
— Davlatni pullarini yeb yotibmiz deng...?!
— Ha, shunday! – debdi yana.
— Talaba ekanmiz-da...?!
— Bu yerda talaba faqat menman...!

Institut hovlisida bir talaba imtihonga kech qolayotgan do‘stini kutib turibdi. Bir payt unga qo‘ng‘iroq qilib debdi:
— Allo, o‘rtoq qayerdasan?
— Mana-mana, institut darvozasidan kirib kelyapman...
— Uyingdan fleshkani olish yodingdan chiqmadimi ishqilib?!
— Voy do‘stim, yaxshi-yam eslatding. Hozir ovolaman.

Bir talaba institut hovlisida ketayotsa, ro‘parasidan soqoli o‘sgan professor kelayotgan ekan.
— Kechirasiz ustoz, siz uxlaganingizda soqolingizni ko‘rpaning tagiga ko‘yasizmi yoki ustida turadimi? - debdi talaba professorni to‘xtatib.
— Bilmayman. Ahamiyat bermagan ekanman, - deb javob beribdi professor.
Oradan bir hafta o‘tgach, talaba institut hovlisida professorni uchratib qolsa, professor jahl bilan unga dyebdi:
— Yaramas, bir haftadan beri uxlay olmayapman! Soqolimni qayerga qo‘ysam ham noqulay bo‘lyapti!!!

Talaba adabiyotdan imtihon topshiryapti. Yozuvchini tug‘ilgan yili esida-ku, vafot etgan yili esida yo‘q ekan. O‘qituvchi:
— Yozuvchini vafot etgan yilini ayting!
Talaba:
— Uni o‘ldi deyishga tilim bormaydi. U men uchun doim tirik!

Ikki kursdosh gaplashyapti:
— Ko‘ylagimni ikki kun ketma-ket yuvdim. Bugun yoqasi yana kir bo‘libdi, - desa, do‘sti:
— Yoqangni yuvgandan ko‘ra bo‘yningni yuvsang, yoqang kir bo‘lavermaydi, - dermish.

Orziqib kutaman har oyda seni,
Olisdan ko‘rinsang ko‘zlarimda nam.
Bermayman bilasan hech kimga seni,
Mening qadrdonim STIPENDIYaM!!!

Imtihonda domla talabaga savol beryapti:
— Besh karra besh?
Talaba qo‘lidagi shpargalkaga qarab:
— Yigirma besh!
Domla ham qo‘li ostidagi shpargalkaga qarab:
— To‘g‘ri! Olti karra olti?
Talaba yana shpargalkaga qarab:
— O‘ttiz olti!
Domla ham shpargalkaga qarab:
— To‘g‘ri! Yetti karra yetti?
Talaba endi shpargalkaga qaramoqchi bo‘lgandi domla uning qo‘lini ushlab qoldi. Talaba o‘ylanib:
— Qirq yetti, - dedi.
Domla endi shpargalkasiga qaramoqchi edi talaba xam uning qo‘lidan ushlab qolsa, domla ko‘p o‘ylamay:
— To‘g‘ri, - dermish.

Talabalar haqida latifalar

Latifa.uz loyihasi haqida

Boshqa loyihalar